ਅਸਤਾ ਛੰਦ ॥
ਅਸਿ ਲੈ ਕਲਕੀ ਕਰਿ ਕੋਪਿ ਭਰਿਓ ॥
ਰਣ ਰੰਗ ਸੁਰੰਗ ਬਿਖੈ ਬਿਚਰਿਓ ॥
ਗਹਿ ਪਾਨ ਕ੍ਰਿਪਾਣ ਬਿਖੇ ਨ ਡਰਿਓ ॥
ਰਿਸ ਸੋ ਰਣ ਚਿਤ੍ਰ ਬਚਿਤ੍ਰ ਕਰਿਓ ॥੪੭੦॥
ਕਰਿ ਹਾਕਿ ਹਥਿਯਾਰ ਅਨੇਕ ਧਰੈ ॥
ਰਣ ਰੰਗਿ ਹਠੀ ਕਰਿ ਕੋਪ ਪਰੈ ॥
ਗਹਿ ਪਾਨਿ ਕ੍ਰਿਪਾਨ ਨਿਦਾਨ ਭਿਰੇ ॥
ਰਣਿ ਜੂਝਿ ਮਰੇ ਫਿਰਿ ਤੇ ਨ ਫਿਰੇ ॥੪੭੧॥
ਉਮਡੀ ਜਨੁ ਘੋਰ ਘਮੰਡ ਘਟਾ ॥
ਚਮਕੰਤ ਕ੍ਰਿਪਾਣ ਸੁ ਬਿਜੁ ਛਟਾ ॥
ਦਲ ਬੈਰਨ ਕੋ ਪਗ ਦ੍ਵੈ ਨ ਫਟਾ ॥
ਰੁਪ ਕੈ ਰਣ ਮੋ ਫਿਰਿ ਆਨਿ ਜੁਟਾ ॥੪੭੨॥
ਕਰਿ ਕੋਪ ਫਿਰੇ ਰਣ ਰੰਗਿ ਹਠੀ ॥
ਤਪ ਕੈ ਜਿਮਿ ਪਾਵਕ ਜ੍ਵਾਲ ਭਠੀ ॥
ਪ੍ਰਤਿਨਾ ਪਤਿ ਕੈ ਪ੍ਰਤਿਨਾ ਇਕਠੀ ॥
ਰਿਸ ਕੈ ਰਣ ਮੋ ਰੁਪਿ ਸੈਣ ਜੁਟੀ ॥੪੭੩॥
ਤਰਵਾਰ ਅਪਾਰ ਹਜਾਰ ਲਸੈ ॥
ਹਰਿ ਜਿਉ ਅਰਿ ਕੈ ਪ੍ਰਤਿਅੰਗ ਡਸੈ ॥
ਰਤ ਡੂਬਿ ਸਮੈ ਰਣਿ ਐਸ ਹਸੈ ॥
ਜਨੁ ਬਿਜੁਲ ਜੁਆਲ ਕਰਾਲ ਕਸੈ ॥੪੭੪॥
ਬਿਧੂਪ ਨਰਾਜ ਛੰਦ ॥
ਖਿਮੰਤ ਤੇਗ ਐਸ ਕੈ ॥
ਜੁਲੰਤ ਜ੍ਵਾਲ ਜੈਸ ਕੈ ॥
ਹਸੰਤ ਜੇਮਿ ਕਾਮਿਣੰ ॥
ਖਿਮੰਤ ਜਾਣੁ ਦਾਮਿਣੰ ॥੪੭੫॥
ਬਹੰਤ ਦਾਇ ਘਾਇਣੰ ॥
ਚਲੰਤ ਚਿਤ੍ਰ ਚਾਇਣੰ ॥
ਗਿਰੰਤ ਅੰਗ ਭੰਗ ਇਉ ॥
ਬਨੇ ਸੁ ਜ੍ਵਾਲ ਜਾਲ ਜਿਉ ॥੪੭੬॥
ਹਸੰਤ ਖੇਤਿ ਖਪਰੀ ॥
ਭਕੰਤ ਭੂਤ ਭੈ ਧਰੀ ॥
ਖਿਮੰਤ ਜੇਮਿ ਦਾਮਿਣੀ ॥
ਨਚੰਤ ਹੇਰਿ ਕਾਮਿਣੀ ॥੪੭੭॥
ਹਹੰਕ ਭੈਰਵੀ ਸੁਰੀ ॥
ਕਹੰਕ ਸਾਧ ਸਿਧਰੀ ॥
ਛਲੰਕ ਛਿਛ ਇਛਣੀ ॥
ਬਹੰਤ ਤੇਗ ਤਿਛਣੀ ॥੪੭੮॥
ਗਣੰਤ ਗੂੜ ਗੰਭਰੀ ॥
ਸੁਭੰਤ ਸਿਪ ਸੌ ਭਰੀ ॥
ਚਲੰਤਿ ਚਿਤ੍ਰ ਚਾਪਣੀ ॥
ਜਪੰਤ ਜਾਪੁ ਜਾਪਣੀ ॥੪੭੯॥
ਪੁਅੰਤ ਸੀਸ ਈਸਣੀ ॥
ਹਸੰਤ ਹਾਰ ਸੀਸਣੀ ॥
ਕਰੰਤ ਪ੍ਰੇਤ ਨਿਸਨੰ ॥
ਅਗੰਮਗੰਮ ਭਿਉ ਰਣੰ ॥੪੮੦॥