ਰਸਾਵਲ ਛੰਦ ॥
ਸੁਨੋ ਰਾਜ ਨਾਰੀ ॥
ਕਹਾ ਭੂਲ ਹਮਾਰੀ ॥
ਚਿਤੰ ਚਿਤ ਕੀਜੈ ॥
ਪੁਨਰ ਦੋਸ ਦੀਜੈ ॥੬੪੧॥
ਮਿਲੈ ਮੋਹਿ ਸੀਤਾ ॥
ਚਲੈ ਧਰਮ ਗੀਤਾ ॥
ਪਠਯੋ ਪਉਨ ਪੂਤੰ ॥
ਹੁਤੋ ਅਗ੍ਰ ਦੂਤੰ ॥੬੪੨॥
ਚਲਯੋ ਧਾਇ ਕੈ ਕੈ ॥
ਸੀਆ ਸੋਧ ਲੈ ਕੈ ॥
ਹੁਤੀ ਬਾਗ ਮਾਹੀ ॥
ਤਰੇ ਬ੍ਰਿਛ ਛਾਹੀ ॥੬੪੩॥
ਪਰਯੋ ਜਾਇ ਪਾਯੰ ॥
ਸੁਨੋ ਸੀਅ ਮਾਯੰ ॥
ਰਿਪੰ ਰਾਮ ਮਾਰੇ ॥
ਖਰੇ ਤੋਹਿ ਦੁਆਰੇ ॥੬੪੪॥
ਚਲੋ ਬੇਗ ਸੀਤਾ ॥
ਜਹਾ ਰਾਮ ਜੀਤਾ ॥
ਸਭੈ ਸਤ੍ਰੁ ਮਾਰੇ ॥
ਭੂਅੰ ਭਾਰ ਉਤਾਰੇ ॥੬੪੫॥
ਚਲੀ ਮੋਦ ਕੈ ਕੈ ॥
ਹਨੂ ਸੰਗ ਲੈ ਕੈ ॥
ਸੀਆ ਰਾਮ ਦੇਖੇ ॥
ਉਹੀ ਰੂਪ ਲੇਖੇ ॥੬੪੬॥
ਲਗੀ ਆਨ ਪਾਯੰ ॥
ਲਖੀ ਰਾਮ ਰਾਯੰ ॥
ਕਹਯੋ ਕਉਲ ਨੈਨੀ ॥
ਬਿਧੁੰ ਬਾਕ ਬੈਨੀ ॥੬੪੭॥
ਧਸੋ ਅਗ ਮਧੰ ॥
ਤਬੈ ਹੋਇ ਸੁਧੰ ॥
ਲਈ ਮਾਨ ਸੀਸੰ ॥
ਰਚਯੋ ਪਾਵਕੀਸੰ ॥੬੪੮॥
ਗਈ ਪੈਠ ਐਸੇ ॥
ਘਨੰ ਬਿਜ ਜੈਸੇ ॥
ਸ੍ਰੁਤੰ ਜੇਮ ਗੀਤਾ ॥
ਮਿਲੀ ਤੇਮ ਸੀਤਾ ॥੬੪੯॥
ਧਸੀ ਜਾਇ ਕੈ ਕੈ ॥
ਕਢੀ ਕੁੰਦਨ ਹ੍ਵੈ ਕੈ ॥
ਗਰੈ ਰਾਮ ਲਾਈ ॥
ਕਬੰ ਕ੍ਰਿਤ ਗਾਈ ॥੬੫੦॥
ਸਭੋ ਸਾਧ ਮਾਨੀ ॥
ਤਿਹੂ ਲੋਗ ਜਾਨੀ ॥
ਬਜੇ ਜੀਤ ਬਾਜੇ ॥
ਤਬੈ ਰਾਮ ਗਾਜੇ ॥੬੫੧॥
ਲਈ ਜੀਤ ਸੀਤਾ ॥
ਮਹਾ ਸੁਭ੍ਰ ਗੀਤਾ ॥
ਸਭੈ ਦੇਵ ਹਰਖੇ ॥
ਨਭੰ ਪੁਹਪ ਬਰਖੇ ॥੬੫੨॥
ਇਤਿ ਸ੍ਰੀ ਬਚਿਤ੍ਰ ਨਾਟਕੇ ਰਾਮਵਤਾਰ ਬਭੀਛਨ ਕੋ ਲੰਕਾ ਕੋ ਰਾਜ ਦੀਬੋ ਮਦੋਦਰੀ ਸਮੋਧ ਕੀਬੋ ਸੀਤਾ ਮਿਲਬੋ ਧਯਾਇ ਸਮਾਪਤੰ ॥੧੮॥
ਅਥ ਅਉਧਪੁਰੀ ਕੋ ਚਲਬੋ ਕਥਨੰ ॥
ਰਸਾਵਲ ਛੰਦ ॥
ਤਬੈ ਪੁਹਪੁ ਪੈ ਕੈ ॥
ਚੜੇ ਜੁਧ ਜੈ ਕੈ ॥
ਸਭੈ ਸੂਰ ਗਾਜੈ ॥
ਜਯੰ ਗੀਤ ਬਾਜੇ ॥੬੫੩॥
ਚਲੇ ਮੋਦ ਹ੍ਵੈ ਕੈ ॥
ਕਪੀ ਬਾਹਨ ਲੈ ਕੈ ॥
ਪੁਰੀ ਅਉਧ ਪੇਖੀ ॥
ਸ੍ਰੁਤੰ ਸੁਰਗ ਲੇਖੀ ॥੬੫੪॥