ਕੁਲਕ ਛੰਦ ॥
ਧਰਮ ਨ ਕਰਹੀ ॥
ਹਰਿ ਨ ਉਚਰਹੀ ॥
ਪਰ ਘਰਿ ਡੋਲੈ ॥
ਜਲਹ ਬਿਰੋਲੈ ॥੮੫॥
ਲਹੈ ਨ ਅਰਥੰ ॥
ਕਹੈ ਅਨਰਥੰ ॥
ਬਚਨ ਨ ਸਾਚੇ ॥
ਮਤਿ ਕੇ ਕਾਚੇ ॥੮੬॥
ਪਰਤ੍ਰੀਆ ਰਾਚੈ ॥
ਘਰਿ ਘਰਿ ਜਾਚੈ ॥
ਜਹ ਤਹ ਡੋਲੈ ॥
ਰਹਿ ਰਹਿ ਬੋਲੈ ॥੮੭॥
ਧਨ ਨਹੀ ਛੋਰੈ ॥
ਨਿਸਿ ਘਰ ਫੋਰੈ ॥
ਗਹਿ ਬਹੁ ਮਾਰੀਅਤ ॥
ਨਰਕਹਿ ਡਾਰੀਅਤ ॥੮੮॥
ਅਸ ਦੁਰ ਕਰਮੰ ॥
ਛੁਟ ਜਗਿ ਧਰਮੰ ॥
ਮਤਿ ਪਿਤ ਭਰਮੈ ॥
ਧਸਤ ਨ ਘਰ ਮੈ ॥੮੯॥
ਸਿਖ ਮੁਖ ਮੋਰੈ ॥
ਭ੍ਰਿਤ ਨ੍ਰਿਪਿ ਛੋਰੈ ॥
ਤਜਿ ਤ੍ਰੀਆ ਭਰਤਾ ॥
ਬਿਸਰੋ ਕਰਤਾ ॥੯੦॥
ਨਵ ਨਵ ਕਰਮੰ ॥
ਬਢਿ ਗਇਓ ਭਰਮੰ ॥
ਸਭ ਜਗ ਪਾਪੀ ॥
ਕਹੂੰ ਨ ਜਾਪੀ ॥੯੧॥
ਪਦਮਾਵਤੀ ਛੰਦ ॥
ਦੇਖੀਅਤ ਸਬ ਪਾਪੀ ਨਹ ਹਰਿ ਜਾਪੀ ਤਦਿਪ ਮਹਾ ਰਿਸ ਠਾਨੈ ॥
ਅਤਿ ਬਿਭਚਾਰੀ ਪਰਤ੍ਰਿਅ ਭਾਰੀ ਦੇਵ ਪਿਤ੍ਰ ਨਹੀ ਮਾਨੈ ॥
ਤਦਿਪ ਮਹਾ ਬਰ ਕਹਤੇ ਧਰਮ ਧਰ ਪਾਪ ਕਰਮ ਅਧਿਕਾਰੀ ॥
ਧ੍ਰਿਗ ਧ੍ਰਿਗ ਸਭ ਆਖੈ ਮੁਖ ਪਰ ਨਹੀ ਭਾਖੈ ਦੇਹਿ ਪ੍ਰਿਸਟ ਚੜਿ ਗਾਰੀ ॥੯੨॥
ਦੇਖੀਅਤ ਬਿਨ ਕਰਮੰ ਤਜ ਕੁਲ ਧਰਮੰ ਤਦਿਪ ਕਹਾਤ ਸੁ ਮਾਨਸ ॥
ਅਤਿ ਰਤਿ ਲੋਭੰ ਰਹਤ ਸਛੋਭੰ ਲੋਕ ਸਗਲ ਭਲੁ ਜਾਨਸ ॥
ਤਦਿਪ ਬਿਨਾ ਗਤਿ ਚਲਤ ਬੁਰੀ ਮਤਿ ਲੋਭ ਮੋਹ ਬਸਿ ਭਾਰੀ ॥
ਪਿਤ ਮਾਤ ਨ ਮਾਨੈ ਕਛੂ ਨ ਜਾਨੈ ਲੈਹ ਘਰਣ ਤੇ ਗਾਰੀ ॥੯੩॥
ਦੇਖਅਤ ਜੇ ਧਰਮੀ ਤੇ ਭਏ ਅਕਰਮੀ ਤਦਿਪ ਕਹਾਤ ਮਹਾ ਮਤਿ ॥
ਅਤਿ ਬਸ ਨਾਰੀ ਅਬਗਤਿ ਭਾਰੀ ਜਾਨਤ ਸਕਲ ਬਿਨਾ ਜਤ ॥
ਤਦਿਪ ਨ ਮਾਨਤ ਕੁਮਤਿ ਪ੍ਰਠਾਨਤ ਮਤਿ ਅਰੁ ਗਤਿ ਕੇ ਕਾਚੇ ॥
ਜਿਹ ਤਿਹ ਘਰਿ ਡੋਲਤ ਭਲੇ ਨ ਬੋਲਤ ਲੋਗ ਲਾਜ ਤਜਿ ਨਾਚੇ ॥੯੪॥
ਕਿਲਕਾ ਛੰਦ ॥
ਪਾਪ ਕਰੈ ਨਿਤ ਪ੍ਰਾਤਿ ਘਨੇ ॥
ਜਨੁ ਦੋਖਨ ਕੇ ਤਰੁ ਸੁਧ ਬਨੇ ॥
ਜਗ ਛੋਰਿ ਭਜਾ ਗਤਿ ਧਰਮਣ ਕੀ ॥
ਸੁ ਜਹਾ ਤਹਾ ਪਾਪ ਕ੍ਰਿਆ ਪ੍ਰਚੁਰੀ ॥੯੫॥
ਸੰਗ ਲਏ ਫਿਰੈ ਪਾਪਨ ਹੀ ॥
ਤਜਿ ਭਾਜ ਕ੍ਰਿਆ ਜਗ ਜਾਪਨ ਕੀ ॥
ਦੇਵ ਪਿਤ੍ਰ ਨ ਪਾਵਕ ਮਾਨਹਿਗੇ ॥
ਸਭ ਆਪਨ ਤੇ ਘਟਿ ਜਾਨਹਿਗੇ ॥੯੬॥