ਬਾਨ ਤੁਰੰਗਮ ਛੰਦ ॥
ਬਿਬਿਧ ਰੂਪ ਸੋਭੈ ॥
ਅਨਿਕ ਲੋਗ ਲੋਭੈ ॥
ਅਮਿਤ ਤੇਜ ਤਾਹਿ ॥
ਨਿਗਮ ਗਨਤ ਜਾਹਿ ॥੫੭੯॥
ਅਨਿਕ ਭੇਖ ਤਾ ਕੇ ॥
ਬਿਬਿਧ ਰੂਪ ਵਾ ਕੇ ॥
ਅਨੂਪ ਰੂਪ ਰਾਜੈ ॥
ਬਿਲੋਕਿ ਪਾਪ ਭਾਜੈ ॥੫੮੦॥
ਬਿਸੇਖ ਪ੍ਰਬਲ ਜੇ ਹੁਤੇ ॥
ਅਨੂਪ ਰੂਪ ਸੰਜੁਤੇ ॥
ਅਮਿਤ ਅਰਿ ਘਾਵਹੀਂ ॥
ਜਗਤ ਜਸੁ ਪਾਵਹੀਂ ॥੫੮੧॥
ਅਖੰਡ ਬਾਹੁ ਹੈ ਬਲੀ ॥
ਸੁਭੰਤ ਜੋਤਿ ਨਿਰਮਲੀ ॥
ਸੁ ਹੋਮ ਜਗ ਕੋ ਕਰੈਂ ॥
ਪਰਮ ਪਾਪ ਕੋ ਹਰੈਂ ॥੫੮੨॥
ਤੋਮਰ ਛੰਦ ॥
ਜਗ ਜੀਤਿਓ ਜਬ ਸਰਬ ॥
ਤਬ ਬਾਢਿਓ ਅਤਿ ਗਰਬ ॥
ਦੀਅ ਕਾਲ ਪੁਰਖ ਬਿਸਾਰ ॥
ਇਹ ਭਾਤਿ ਕੀਨ ਬਿਚਾਰ ॥੫੮੩॥
ਬਿਨੁ ਮੋਹਿ ਦੂਸਰ ਨ ਔਰ ॥
ਅਸਿ ਮਾਨ︀ਯੋ ਸਬ ਠਉਰ ॥
ਜਗੁ ਜੀਤਿ ਕੀਨ ਗੁਲਾਮ ॥
ਆਪਨ ਜਪਾਯੋ ਨਾਮ ॥੫੮੪॥
ਜਗਿ ਐਸ ਰੀਤਿ ਚਲਾਇ ॥
ਸਿਰ ਅਤ੍ਰ ਪਤ੍ਰ ਫਿਰਾਇ ॥
ਸਬ ਲੋਗ ਆਪਨ ਮਾਨ ॥
ਤਰਿ ਆਂਖਿ ਅਉਰ ਨ ਆਨਿ ॥੫੮੫॥
ਨਹੀ ਕਾਲ ਪੁਰਖ ਜਪੰਤ ॥
ਨਹਿ ਦੇਵਿ ਜਾਪੁ ਭਣੰਤ ॥
ਤਬ ਕਾਲ ਦੇਵ ਰਿਸਾਇ ॥
ਇਕ ਅਉਰ ਪੁਰਖ ਬਨਾਇ ॥੫੮੬॥
ਰਚਿਅਸੁ ਮਹਿਦੀ ਮੀਰ ॥
ਰਿਸਵੰਤ ਹਾਠ ਹਮੀਰ ॥
ਤਿਹ ਤਉਨ ਕੋ ਬਧੁ ਕੀਨ ॥
ਪੁਨਿ ਆਪ ਮੋ ਕੀਅ ਲੀਨ ॥੫੮੭॥
ਜਗ ਜੀਤਿ ਆਪਨ ਕੀਨ ॥
ਸਬ ਅੰਤਿ ਕਾਲ ਅਧੀਨ ॥
ਇਹ ਭਾਤਿ ਪੂਰਨ ਸੁ ਧਾਰਿ ॥
ਭਏ ਚੌਬਿਸੇ ਅਵਤਾਰ ॥੫੮੮॥
ਇਤਿ ਸ੍ਰੀ ਬਚਿਤ੍ਰ ਨਾਟਕ ਗ੍ਰੰਥੇ ਚਤੁਰ ਬਿਸਤਿ ਕਲਕੀ ਅਵਤਾਰ ਬਰਨਨੰ ਸਮਾਪਤੰ ॥